香港人好渴望去旅行探索異國，疫情關係冇得去旅行時，點解唔發掘下本地嘅另一面？就好似幾平凡嘅街頭窄巷，喺自己友 freelance攝影師Natalie Lau嘅鏡頭下都會變咗仙境。獨特嘅科幻迷人Cyberpunk風格令佢Instagram @natalie_studio_ 坐擁超過七千followers，贏過HongKong Neonlight Photography Competition，佢嘅作品仲做埋Sony Editor’s Pick。
Natalie 影咗相都有6年，本來都係產品拍攝為主，但早兩年失業竟然成就咗佢踏上街拍之路。 「本身我係影嘢食多，但係兩年前我就失業，日日喺屋企冇嘢做，我就諗既然日日吽喺屋企，不如攞部相機出去乜都影下。喺街邊影下日頭又影下夜晚，就變到enjoy街拍，尤其是喺夜晚捕捉到啲光軌好有滿足感。到依家返返工，放工都會周圍影下相。」
穿插街頭，作品少不免會夾雜小插曲，要數Natalie最深刻嘅經歷一定係「等」。「我企咗喺西環電車站度兩個鐘，就係為咗一take過影到自己想要嘅效果，令張相可以不經Photoshop咁呈現喺大家眼前。」提到作品，Natalie 即刻忍唔住介紹多啲：「咁啱影埋後面IFC，好巧合咁將香港元素放埋一齊，所以覺得好代表到香港。」
後期製作能夠將一張相錦上添花，Natalie指啱啱起步時都係上YouTube睇下教學，雖然來來去去都係嗰幾個技巧，但用嘅時間心機一啲都唔少，甚至試過花咗足足5個鐘嚟做後期，絕對稱得上心血之作。「我分別喺灣仔碼頭日頭同夜晚用同一個角度影，影完之後我就將兩張相合拼埋一齊，轉咗背景再tune色。聽落好簡單，但其實好多detail例如大廈邊都要抹得好乾淨，再加咗啲流星、月亮咁。」
Natalie 對呢個藍橙色調情有獨鍾，香港又比較少呢隻tone嘅作品，所以玩咗好耐都未厭，仲希望嚟緊加埋多啲超現實嘅元素。
疫情下香港人特別想去旅行，但係Natalie反而覺得可以趁機探索香港「身邊啲朋友都話好渴望去日本，但大家都唔係好了解香港，覺得冇地方去、又細。香港其實好靚尤其是夜景，例如霓虹燈好有味道而其他地方係冇嘅。所以好想將香港嘅特色帶俾大家睇，當係重新認識香港咁。」所以今個月佢將自己嘅十幾張作品進行公開展覽，名為「黑夜．光芒 Glow in the Dark」，俾更多人欣賞到香港夜景嘅美麗。
街拍短短兩年就已經有咁多成就，Natalie自己都話幾滿足，其他玩咗街拍好多年嘅人都冇機會搞相展。佢現時雖然係全職平面設計師，但平時都有接啲影人像嘅freelance job，嚟緊會努力儲靚個作品集，向全職freelance攝影師嘅目標進發。
Natalie 又分享咗啲心得俾同佢一樣嘅freelance攝影師：「一定會有啲人係鍾意你，有啲人麻麻地你，只要你覺得你做緊嘅嘢係啱，就keep住做；都有人話過我『乜你玩嚟玩去都係嗰啲色』，咁但係個account係我㗎嘛，唔使特登迎合哂所有人嘅口味，做返自己就OK。」
