所謂辛苦搵來自在食,平時搵錢搵得咁辛苦,食好啲都唔過份!講到威靈頓牛柳,相信大家第一時間會諗係Gordon Ramsay 嘅餐廳,好可惜香港嘅分店已經全線結業啦,不過唔緊要,原來香港仲有一間好頂級嘅傳統英式餐廳可以食到好食嘅威靈頓牛柳!佢就係位於銅鑼灣嘅The Leah。
The Leah
銅鑼灣恩平道28號利園二期3樓303-309及311號舖
餐廳分為內部及露台,唔怕熱又浪漫嘅自己友可以係預約時落remarks提提店員你想坐露枱啊!餐廳主打英國菜,最岀名的除了威靈頓牛柳外,就一定係蘇格蘭流心蛋,呢款小食以香腸及麵包碎包裹溏心蛋,旁邊脆脆的麵包條點上溏心蛋黃真係冇得彈啊!
主菜威靈頓牛柳係需要pre-order嘅,大家要留意啦,本來供預訂的威靈頓牛柳是四人份,但店員都非常友善,在預訂後,因留意到訂座人數只有2人,而詢問小編要唔要細份啲嘅威靈頓牛柳,當然價格亦相對便宜,因此,情侶檔去食嘅自己友都唔洗驚食唔曬啊!係真正品嘗威靈頓牛柳之前,店員仲會攞個完整版嘅威靈頓牛柳俾食客影咗先,認真係相機食先!牛柳嘅熟度當然係啱啱好啦,保留咗好多肉汁,好腍,仲有甜嘅紅汁煮醬配撘,而最特別係,包裹牛柳嘅蘑菇有黑松露味,比其他餐廳嘅威靈頓牛柳更特別!
甜品就有Sticky Toffee Pudding,唔好睇佢好似好普通咁,食落真係好甜,加埋蛋糕面上嘅cream又中和返甜度,拖啡味亦夠濃,真係可以食完一碟再食一碟啊!
要提提大家,店員落單時會問你飲咩水,如果大家諗住叫飲品,就記得唔好order水啦,要收費㗎,而小編就點咗呢杯Earl’s Old Fashioned 系列嘅Earl Grey Tea & Orange,適合鍾意飲whiskey 嘅朋友。