不孝有三，無圖為大。無圖除左係不孝子既死穴之外，亦係唔少工作者既煩惱。今時今日，人類對於圖既執着已經遠遠超過想象，一張低清起格既驗眼圖比起無圖確實更加令人感到髮指。但偏偏高質貼題既圖，因為版權問題，用家往往要比一筆錢去買圖，令唔少生活拮据既人迫於無奈違背孝義，受盡千夫所指。
但天無絕人之路，Unsplash圖庫既出現，令香港終於有機會擺脫文字之都既罪名！
Unsplash係咩黎？
Unsplash係一擁有超過四十萬張圖片既素材庫，最大既賣點就係所有圖片都無版權，換言之所有人都可以免費下載入面既圖片。而且全部都係高清高質圖，只要你上Unsplash既網頁或者手機App就可以下載。
圖片邊度黎？
Unsplash既圖片都係世界各地既人自願上傳到網站分享既，對於一啲熱愛攝影既朋友確實係一個唔錯既平台去分享自己既作品，同時用家又可以免費採用所有作品，用既同時亦可以比返個LIKE攝影師，鼓勵一下有熱誠既攝影新鮮人。
Unsplash另一個賣點，就係無需提交任何個人資料就用得，用家唔洗擔心私隱問題。不過注意Unsplash係外國網站，搜尋既時候記得打翻英文啦。
睇到呢度既你，為左香港，為左家人，唔好再沉醉於純文字討論啦，一齊將Unsplash既消息分享出去，將香港變返做圖片之都啦。
