Apple正式推出iOS 14,今次雖然比以往升級新增嘅功能唔算多,但變化絕對唔細!佢將之前嘅「畫中畫」功能由限於Safari改良到全區域,又將預設瀏覽器Safari同Apple Mail信箱,開放俾第三方程式Chrome、Gmail、Outlook等等,快啲跟住小編試下啲新功能先。
1. 主頁面schedule
用開iPhone嘅小編有陣時都會羨慕Andriod有得喺手機主頁面放schedule,依家iOS升級咗都可以加天氣、股市、行事曆等等嘅工具App入面嘅資訊,再較埋App嘅大細,常用嘅嘢終於可以唔使撳入去先睇到,掂!
2. 整理APP
另外,覺得手機App太多、分咗好多頁,可以將唔常用嘅App放埋同一版,之後長撳其中一個App>編輯主畫面,就有得收埋佢喇。
3.內建離線語音
相信Google Translate係大家最常用嘅工具之一,iPhone系統今次升級仲具備埋內建離線語音、文字翻譯工具,入面包含11種語言,例如英文、普通話、日文、德文等等,不過暫時就未有廣東話了。
4.selfie自動校正
平時用iPhone前置鏡頭selfie其中一個最大嘅問題一定係,左右返轉搞到自己個樣勁怪!不過依家終於唔使怕,更新咗之後可以喺「設定>相機>前置相機鏡像翻轉>開啟」,就可以唔使影完再用App整返啱啦。
5. 零騷擾來電提示
放假用緊手機突然收到電話,打打下機被迫暫停,真係冇仇報。依家唔驚~Update咗後,iPhone會喺你解鎖後收到電話都會變成一般通知咁,喺螢幕上方彈條banner出嚟,唔怕影響你做緊嘅嘢啦。
連Siri都一樣,同佢嘅對話會精簡、縮埋喺下面,完全唔佔畫面。
6.篤背脊新玩法
iOS 14 有個篤背脊嘅新玩法添!去「設定>輔助使用>機背點按」,之後就可以分別設定篤兩下同三下可以有咩操作,包括Cap圖、較音量、鎖定螢幕等等,方便得多~
7.智能勿擾模式
用過iOS 13嘅都知道,iPhone好耐之前已經有請勿打擾嘅睡眠模式、記錄你瞓覺時間嘅功能。iOS 14依家更加升級咗!可以set埋iPhone喺瞓覺時間前幾多分鐘溫馨提示你要瞓,確認後佢就會自動進入勿擾模式,之後仲可以設定埋你用開嘅App快捷途徑,等你臨瞓前直接入去check 添!
8.隱藏相片功能
先前美國隊長唔小心post咗自己隻雀仔上網,都知道隱藏相片嘅功能有幾重要。依家iOS 14可以幫你加密再加密,喺「設定>相簿>已隱藏的相簿>關閉」,就連個相簿都可以消失得無影無蹤。
雖然iOS 14嘅新功能真係好令人心急想用,但有啲App都未趕得切支援到最新嘅iOS版本,所以各位更新前記住留意自己用開嘅App支唔支援到。