iPhone 12系列其中一個賣點就係機身用上陶瓷晶體護面,大大加強玻璃嘅堅硬度。雖然話無咁易爆Mon,但咁貴買部新手機,跌落地都幾心痛。有外國Youtuber就率先為大家測試咗由唔同高度跌手機會有咩效果,快啲睇吓新手機嘅防爆效果抵唔抵買啦!
暫時嚟講比較少手機會用上陶瓷晶體護面(Ceramic Shield)技術,相信各位朋友都好期待今次測試結果。今次用咗iPhone 12同iPhone 12 Pro做測試,分別將兩部機由半身、成年男士及 3 米嘅高度跌落地下,睇吓前後玻璃、邊框會唔會爛。
首先係由半身嘅高度跌落地下,邊框出現刮花痕跡,但前後玻璃都無事。
之後就試吓喺成年男士嘅高度跌部機落地,邊框開始有明顯嘅痕跡,唔止係刮花。機面同機身嘅玻璃都完好無缺,不過iPhone 12 Pro個Mon就有輕微問題喇!
最後試吓爬上3米高度跌手機,機側落地之後,iPhone 12嘅相機就一片黑色,影唔到相,而iPhone 12 Pro仲繼續影到相。當兩部手機由機背落地後,機背玻璃就碎咗,但機面玻璃仲係無事。
由以上嘅測試可見,iPhone 12系列的確較以為嘅設計實用同出色。雖然加強咗防爆功能,不過大家都係小心啲拎好啲部機,唔跌落地就萬無一失啦!