今日，我撞返個中學死黨。仲記得佢以前成日扮周星星講：「做人無夢想，同條咸魚有咩分別。」但今日同佢細談之下，發覺短短數年間，社會早已將佢既口頭禪徹底磨滅。「聽日仲要返工呀。」
啲人咪成日笑香港人，佢地返工既決心可以抵抗一切障礙，咩山竹玉兔都唔可以再阻止香港人返工既？有如此強大既奴性，因為由細到大，填鴨式教育日夜灌輸我地，要做一個成功既香港人只有一條路：讀書，沙紙，打工。唔依照呢條方程式行既人，淨係左鄰右里既白鴿眼都有排你受。
但打工，係咪真係唯一既出路？你有無發覺，你已經成為一條瀕死邊緣既咸魚？
香港人就好似少林足球既豬肉佬同醬爆咁，心底裡都有一個不為人知既夢，可惜生活令佢地差啲忘記左，原來跳舞唱歌係一件咁快樂既事。
大部分人畢業後，目標都變成先砌好cv，再不知不覺窮半生精力為唔同公司做齒輪。結果，佢地成功得到一份完美既履歷，家人欣慰既笑容，仲有看似穩定既將來，但呢一切令人變成令人固步自封既城牆，無法再冒更多既險。
想追夢呀？讀好啲書拎張沙紙先啦。得張沙紙邊夠，要累積下工作經驗先。做左幾年野，經驗夠了錢都儲左少少，但屋企人另一半又催緊成家立室，擔心唔結就分，結埋先啦。結婚要有個家，叻啲既就開展業主/樓奴生涯，冇首期既，都要負擔返一定程度既租金俾自己既家庭。一世人流流長，細個時要讀書，大個左要做野，咁到底做人去到邊個位，先係追夢既時候？
傳說中要放棄一切去追既呢個夢，如同未出世先夭折既嬰兒般，胎死腹中。
其實，追夢並唔難。差在你幾時有勇氣行動。唔係無止境既計劃，空談，而係行動。就算要打工維持生計，都唔代表放工後就可以忘記夢想。做啦，鍾意寫作既你，開始寫啦；有住一把靚聲既你，點解唔試下拍下片，表演下？
又或者，嘗試接第一份freelance，用自己既才能幫人？
只要將一件事發揮到極致，相信你自己，
你一定可以行出自己既路。
