唔知有無人同我一樣，做野既時候，一定要放杯珍奶係隔離先安樂。根據我飲左數十年（好似應該係十數年先啱）珍奶既經驗，就等我今日分享下最出名既幾間台飲比大家增下肥！
丸作
丸作以手作珍珠為名，吸引左唔少死忠，連台灣人都大排長龍！係丸作你可以食到唔同口味既珍珠，例如白玉珍珠，黑芝麻珍珠，仙人掌珍珠 ，竹炭珍珠同焦糖珍珠等，款款口味新奇，食落又煙韌彈牙，真係忍唔住一試再試！
皇牌飲料：仙人掌珍珠綠拿鐵，宇治抹茶白玉，焦糖琥珀拿鐵 (加焦糖珍珠)，丸仨冬瓜檸檬 $25
Just Bobba
Just Bobba係天仁茗茶既副線，主打手作珍珠，推出蜂蜜味、火龍果味鮮果珍珠，更期間限定榴槤珍珠，真係齋聽都想試下飲。而且珍珠可以免費加，珍珠控一定唔好錯過！而茶底以原葉茶，如大紅袍、鐵觀音來沖泡，再加鮮奶，一杯正宗既鮮奶茶就咁誕生！
皇牌飲料：榴槤鮮奶綠，招牌鮮奶茶，Bobba鮮果茶 ，香芋鮮牛奶
迷客夏
係台灣都有超過200間分店既迷客夏，本年度六月才剛到港，近期再於銅鑼灣發展。台舖主打鮮奶飲品，其中既芋頭鮮奶係鎮店之寶，香醇濃厚既味道令你一試難忘！
皇牌飲料：大甲芋頭鮮奶、珍珠紅茶拿鐵
如果經過既話，記得買返杯陪你工作啦！
