疫情下又唔想出街,上網睇見啱心水靚衫又冇得試,又怕等退貨等到頸都長⋯⋯因應疫情人人冇得Shopping,外國再次興返一個可免費下載嘅時裝尺碼APP MySizeID,方便客仔唔使去門市試身,唔使買完衫唔啱著。
透過參考各個品牌嘅尺碼表,仲有用戶喺APP輸入同量度嘅數據,嚟分析出用戶嘅身形比例,俾你一APP睇盡自己著咩牌子嘅咩碼,著佢上身、下身或運動服裝嘅又係咩碼!佢合作嘅品牌都係國際知名嘅服裝品牌,包括香港人都好熟悉嘅Adidas、FILA、ZARA、Superdry等等,應有盡有
iOS 同Android都支援,只要係iPhone6或以上,或者手機有得fing就用得。講多無謂,即教你電郵註冊後幾步快速搵出你著咩size!
第一步:先跟指示輸入你男定女、芳齡幾歲,同埋身高體重等基本資料。
第二步:再較大聲啲手機音量,換上貼身啲嘅衫褲,喺屋企搵一幅牆準備。
第三步:然後開始度Size!依次序量度:你胸口最厚肉嘅部份、胸口幾闊、蘿友幾橫、手臂幾長4個部份,每個部份步驟都有少少唔同,但大致都係:
- 首先將個人背貼住牆,撳Start
- 再將手機放喺要量度嘅部位,等佢發出「嘟」一聲
- 呢個時候就可以將手機放喺部位嘅另一邊,又係等佢「嘟」
- 之後再次將手機放返喺原先嘅位置,「嘟」,儲存,完成!
嫌小編講到1999?APP入面每個步驟都有教學片段,有得睇片仲有需要講咁清楚咩!?好彩有好心人放咗上網,嗱,俾你哋參考下:
嘟幾下就可以知自己著咩size,方便過超市自助嘟,仲搵鬼尺左度右度