雖然工作性質長期都Work from home，或者冇定時嘅工作時間，好容易畀少少嘢就會分咗注意力，搞到一件事有排都未做完。經常性都想逃避或分心都令到個人情緒低落，試吓以下呢4招，幫助你提升專注力。
1. 創造自己專心前嘅儀式
講到儀式好似好誇張咁，呢個動作嘅目的係話畀自己個腦袋知道「你要準備專心」，每個人嘅動作都可以好唔同，我有朋友係做嘢前會放曬啲紙筆，好似擺陣咁，我自己就會食香口膠同狂飲水。當然做一兩次就冇咩用，當你次次咁做日日咁做，成為習慣就會畀個signal個腦，開始無雜念mode。
2. 分解同制定合理目標
成日唔想做，或者做做吓走咗去做其他嘢，都係下意識嘅自己想逃避同太大壓力想唔做。做人千萬唔好太高估個人能力，以為自己可以一日做到好多好多嘢，再肆無忌憚咁拖，咁只會令個腦更抗拒，試下將一件事早啲做，拆細啲做，每日做少少，訓練自己要做to-do-list入面1-2項先休息，慢慢咁加，而且目標係合理，都會提升個人專注力。
3. 小休
講講下要專心，點解又要話去休息？因為小休係幫助提升專注力重要嘅一環。相信大家都有試過做嘢做到個腦實晒，完全諗唔到其他嘢，咁係因為個腦太多嘢，話畀你知需要休息下。30分鐘嘅午覺就最好，可以做到休息又唔會影響夜晚訓覺。如果你初初想練專注力，建議可以較個35分鐘嘅鬧鐘，時間一到就休息5-10分鐘，慢慢疊加，都係一個提升專注力嘅好方法。
4. 同一時間只做一件事
細到大都畀屋企人話做吓呢樣做吓個樣，唔夠專心，反思返以前做嘢的確又聽歌又開住電視，啲功課都淨係做一半就跟住唱歌，再搵埋MV睇。之後要做嘅嘢越嚟越多，試下唔再聽歌睇電視，隔絕影響你嘅環境，只專注於你嘅工作上，效率會快好多。如果怕自己太靜會訓覺，可以播輕快嘅純音樂，好似喺café咁，都不失一個好方法。
可能之後開始要返office，或者增加唔少工作量，但又慣咗疫情期間懶懶散散咁，都可以試吓以上嘅方法。最重要就係唔好操之過急，慢慢嚟，續啲續啲咁去練習，之後一下有成果！
