Signal今個星期下載次數驚人，唔少WhatsApp用户都「移民」去Signal。Signal以較高嘅私隱度、無廣告見稱，用户可免費下載程式，亦可自由選擇在App內捐錢支持Signal。Whatsapp喺香港已經有超過10年歷史，到底今次Signal能唔能夠成功取代Whatsapp，改變大家嘅通訊習慣？
先睇睇Signal嘅優點，Signal有多項保障私隱嘅措施。大家可以喺App內㩒「設定」，選擇「隱私權」，就會見到多項保障個人資料嘅措施，可以按自己嘅使用習慣，開啟所需措施。
Signal同Whatsapp一樣有打電話功能，如果大家想保護好自己嘅IP地址，可以開啟「永遠轉發通話」功能。系統會將你嘅通話透過Signal伺服器轉發，避免洩漏用戶嘅IP地址，不過啟用呢個功能會令通話品質降低。
大家亦可以登記PIN碼，以Signal加密方式儲存資料，將來大家如果要換電話，只需要輸入正確嘅PIN碼，就可以輕鬆復原個人資料、設定同埋聯絡人。
雖然Signal比Whatsapp更加能夠保護用戶嘅資料，不過喺用戶體驗上仍然有不足嘅地方。現時，大家只能夠選擇黑色或者白色嘅wallpaper，冇辦法好似WhatsApp咁樣自設相片。
雖然喺電腦都用到Signal，但就一定要喺官網下載應用程式，暫時未有提供網頁版。另外電腦版嘅Signal並唔會同步手機嘅聊天記錄，所以大家一開頭用電腦版嘅時候就會睇唔到手機嘅對話紀錄。
