近日疑有freelancer喺連登控訴自己慘被走數。我哋手停口停工作室編輯部亦都搵到事主,講返發生咩事。事主話喺上年10月,眼鏡舖瑞士寶經服務交流平台HelloToby搵到事主,繼而WhatsApp事主講好會喺月尾過數,事主亦喺兩星期後完成交貨。
事主前前後後改過好幾次份作品,又同過眼鏡舖唔同同事交涉。交貨後事主多次追問其中一位同事出糧安排,但都只係得到「同你check下」嘅答案⋯⋯卒之到兩個幾月嗰位同事先向佢坦白,話自己已經辭咗職。
事主唯有搵返接手嘅同事,但對方回覆話因為條片同老闆要求有出入,所以唔算收貨,如果做返老闆要求嘅先會找數,又話離職同事冇交待清楚,當時又冇簽過報價單或者任何確認交易嘅文件,所以唔會無端端俾錢。最後事主決定將件事放上網。
事主接受手停口停工作室編輯部訪問時話,當時離職同事喺HelloToby問佢報價並唔係以公司名義,所以並冇搵到HelloToby處理。嗰位離職同事主動提出,可以自掏腰包先住錢畀事主先,等公司找咗數,事主再還番錢。雖然事主都叫收到錢,但佢唔希望件事就咁算。本來仍然打算去小額錢債審裁處申索,不過之後我哋又收到事主嘅消息,話瑞士寶同佢講報咗警,同埋會保留追究佢指責、誹謗公司嘅法律責任權利,所以事主決定暫時睇定啲先。
瑞士寶截稿前都未有回應。而小編就問過HelloToby話對事件唔知情,條款寫明佢哋作為服務交流平台只係幫freelancer搵客,提供聯絡資料俾雙方佢哋自己deal,唔會直接介入交易或者為佢哋作出交易、協議、合約或安排。HelloToby話如果發生糾紛,建議雙方保存對話紀錄俾佢哋跟進,佢哋會採取合適措施甚至永久凍結相關人士帳號,以確保同類事件不會再發生;而遇到緊急或違法事件,就會建議用戶聯絡警方以確保自身利益同安全。
各位Freelancer除咗喺使用呢類平台時要細心留意相關條款,唔想遇到呢啲客,就要識得以下幾招自保:
- 白紙黑字冇得輸
做得freelancer能夠幫自己嘅就只有自己,就算係HelloToby呢類平台,往往都要freelancer作出相應措施保障自己。所以第一件事要避免電話傾、冇留底,仲要起齊Quotation、Invoice、Receipt,清楚列明收費、詳細工作內容、條款及細則,要對方簽名加公司印作實,工作內容有大變動更加要出過張新嘅,大家清楚之餘又唔怕出事冇得追;如果涉及長期合作或金額較大就最好當面簽添。
唔識起?入嚟睇埋我哋財務文件懶人包!
- 訂金走唔甩
唔熟行情嘅客好多時「你信唔過佢、佢又信唔過你」,要求收咗成品先俾錢,有辦你睇㗎,某紀律部隊精英入便利店淨係拎人哋枝水都夠膽走咗去啦。所以最好喺文件度寫定要俾訂金同set deadline,長期或大型項目甚至可以自定分期,就算佢走數都揦返拃沙。
- 落水印冇有怕
做設計、製作嘅freelancer遇到上述問題同樣可以出奇招KO佢哋,未收到錢前只出個有水印嘅版本,咁佢想走數都只可以拎住有你個大朵嘅版本走佬。
- 同朕check下佢個底
Freelancers 不時會遇上各式各樣客人,接單前不妨上下客戶社交網站、網上討論區睇下人哋嘅comment,平時同你身邊嘅行家交流下,話唔定個客臭名遠播而你不知道,咁就中伏了⋯⋯
所以大家除咗要帶眼識人,仲要帶眼接JOB呀!最好就mark實我哋定期提供的freelancer資訊,咁就冇有怕啦!