石門出名黃店多!又多種類!所以小編專程嚟到石門呢個美食廣場,睇吓有咩啱食推介俾大家。今日小編介紹呢三間餐廳可以滿足你正餐甜品同宵夜!
1. Supine
呢間burger出名大份又好味,小編今日就試試有幾大份!試咗個美國牛柳薯餅漢堡,好誇張真係有10層咁多!有15cm咁高,超大個burger。有芝士、洋蔥、牛柳、薯餅、菇、蕃茄、蔬菜、麵包……口感非常豐富,因為個牛柳真係好好味!仲要有兩層都係牛柳呀,加上薯餅鬆脆,非常夾!一個人真係食唔晒,仲有大量嘅薯條!細食嘅朋友仔可以兩個人一齊食!
相片來源:網上圖片
另外要介紹嘅係烤挪威三文魚燒菠蘿漢堡。見到大大嘅三文魚已經覺得會好飽!好足料啊!口感軟熟,三文魚加上香草同黑胡椒,味道不錯。另外菠蘿酸酸甜甜,剛剛好中和三文魚嘅油膩感!
相片來源:網上圖片
地址:沙田石門安群街3號京瑞廣場1期2樓210號舖
營業時間:11:00-21:00
2. 豆腐巴克
食完正餐口痕想食甜品!正所謂甜品係第二個胃,點都食到嘅!跟住要推介係呢間!
首先要介紹嘅係炸芋圓,睇佢嘅賣相冇諗到係會食到上癮!芋圓味道有番薯、紫薯同芋頭。炸芋圓外脆內煙韌嘅口感真係有驚喜,加上煉奶係絕配!真係一路食一路食停唔到!係二人份量,兩個人食都好飽!
相片來源:網上圖片
另外介紹嘅係招牌一口炸豆腐,豆腐口感外脆內軟滑,有蜜糖芥未醬同蘸甜醬,加上有孜然粉同椒鹽調味,口痕又唔想食咁飽揀呢款一流!
相片來源:網上圖片
地址:沙田石門安群街3號京瑞廣場1期2樓209號舖
營業時間:11:00-21:00
3. Explorer Fusion Restaurant
最後行到攰攰地又口痕想食宵夜,可以選擇呢一間!
平時呢間餐廳有日本菜西式同日式西餐,但係五點後就會有宵夜!有串燒、小食、酸辣粉…… 價錢都好合理,好似牛肉串$50@3串,燒羊架$40@1,宵夜一流!如果想食飽少少,可以推介美式吉列黑豚肉漢堡配薯角,有沙律薯角漢堡,夠晒飽肚!burger包係脆!十分香口,帶點芝麻味,再加牛油,口感非常好!黑豚肉煙韌鬆脆,口感唔會太硬,加上醬汁非常出色!另外有煎蛋、煙肉、番茄配搭令到口感層次豐富,唔會太油膩。
相片來源:網上圖片