無論係新晉Freelancer定係資深自己友,接Job嘅時間常常會遇到阿客經常問「有冇得平啲」,搵著數係人類天性,阿客多口問句又唔使錢,話唔定真係有「善良」嘅自己友肯減價。其實大家做Freelance都係求財啫,時間又花咗,錢又收唔多,到頭來搞著自己。如果個客出價太低點算好?還價可以點講?唔接想好嚟好去又可以點?
1.做足行情分析
之前同大家講接Job前要起下個客底,其實除咗呢樣之外,同時都要睇下同行市價收緊幾錢。一嚟保障自己唔會underpaid之餘,二嚟都知道同個客之後還價Bargain時,個上下限係邊到。唔好怕醜,多啲問下同行朋友啦!
2.建議其他折衷方法
如果份Job你真係好想接,但係個客出價太低,可以試下提出其他可行條件。例如因應個客畀到嘅預算,去調節自己提供嘅服務及成本,以達至雙嬴。
3.話畀佢知收費詳情
自己友心知肚明,客户只想要成品,對於件嘢係點樣做出嚟,佢地係完全冇概念。如果覺得對方有誠意,只係唔熟行情,不妨列個表出來,大家講清楚。有啲不熟行情嘅客户,會以為自己友開個價係巧立名目而去壓價,例如搵場、打燈、執相⋯⋯呢啲樣樣都係錢,講清楚畀客户知道涉及啲咩費用,就減少被壓價嘅機會。
4.要求對方畀時間你考慮
如果以上幾步都做晒,個客開出嘅價你亦唔滿意,可以要求對方畀時間你考慮。例如考慮下對方日後嘅合作潛力,值唔值得減少少價接Job變相作為關係嘅長遠投資。但切忌做爛市,如果唔係遲早都係自己受害!
5. 諗清楚就打畀個客啦
雖然WhatsApp真係好方便,但係通過電話聽到你把聲會畀人感受到你嘅真誠同專業,同埋講錢呢啲咁敏感嘅話題,電話五五六六講清楚就唔會有咩誤會啦。
6. 友善感謝對方但表明立場
講到最後如果都係傾唔成單Job都唔緊要,都要禮貌地向對方表達謝意,大家好嚟好去,話唔定下次有機會合作呢。不過都要清楚表明自己認為可接受嘅薪資範圍,畀對方知你知道自己嘅價值,同時都堅持自己嘅底線。