對於freelance自己友黎講,喺一個只靠自我約束既環境下工作真係唔容易。人既惰性係會隨環境影響而增加,喺無人管束之下,應該要完成既工作往往都拖到最後一秒先去做。而我正正係拖延症既末期病患者,你估下我打呢篇文睇左幾多次電話,拖左幾耐先會打得完?為此,我決定參考其他前病患既方法,希望可以搣甩我鋪拖延癮。
為左對症下藥,首先問下自己點解咁鍾意拖。其中一個常見原因就係無動力。適當既甜頭可以令你更加有動力做好件事,例如完成一個task就可以休息廿分鐘,或者係限時內達到目標既話就可以買心儀物品等等。再玩大啲甚至可以將啲重要野交比朋友,要完成工作你先可以拎返。相信係呢種威迫利誘既情況下,工作效率可以極速提升。
另外我都有聽過,有啲完美主義者會因為set得個目標太高,而索性唔做。首先,呢種行為當然相當反智,皆因成就感都係令你堅持工作既源動力。隨住目標一開始就set到咁高,無論幾努力都無辦法一下子成功達標,呢種過程好易令你覺得挫敗同容易放棄。因此目標應該由低至高咁set,慢慢增加難度,一步步循序漸進咁邁向目標,先係理性而明智既選擇。
睇到呢度既你,有無發現自己明明依足上面既方法,但都好似未戒到拖延症?
因為你掛住望電話囉!想專心做野就唔該放底你部電話,拎齊要用既野,入房閉關到做完啲野為止。做好哂先好繼續睇我地啲文呀,知無?