各位自己友平時做嘢口痕想食啲零食會揀啲咩?大家以為水果乾係健康零食,食多啲都唔驚?咁就大錯特錯啦!消委會揀咗6類水果乾去檢測,總共驗咗31款唔同牌子嘅水果乾,發現全部屬於高糖。有1款嘅實際糖分仲要超出標示19倍,唔覺唔覺食咗好多糖,大家真係要小心啊!
根據食安中心嘅標準,每100克固體食物中有超過15克糖就屬於「高糖」,今次所有測試嘅產品都超標。消委會話水果本身都有天然糖分,整做果乾嗰陣抽乾咗水,果糖濃縮之後糖分含量比例上升,加上飽腹感低,有啲果乾又細細粒,好易越食越多吸入過多糖。
平均糖分含量最高嘅係提子乾,每100克入面有成57.4克糖。
第二名係好多人鍾意食嘅芒果乾,每100克入面都有56.1克糖㗎,4款測試樣本中,有3款都額外添加糖分。
第三名係小紅莓乾,每100克的平均含量為52.6克,本身呢款水果味道較酸,整果乾要加多啲糖中和酸味。
第四名係藍莓乾,每100克的平均含量為50.6克,因為藍莓味道較酸,同小紅莓一樣要加糖去整。
第五名係士多啤梨乾,每100克的平均含量為44.5克
相比之下最低糖分嘅係杏脯,每100克的平均含量為35.8克。
想食得健康啲,就要注意食嘅分量啦!買之前記得睇清楚包裝嘅成分表,盡量揀無添加糖分嘅水果乾。顏色太過鮮艷、變質或發霉嘅水果乾就唔好買啦!